आफ्नो राजीनामाको मागलाई विश्व स्वास्थ्य संगठनका प्रमुखले गरे खारेज

विश्व स्वास्थ्य संगठनका महानिर्देशक टेड्रोस आधानोम गेब्रेयेसुुसले आफ्नो संस्थालाई अमेरिकाले दिने आर्थिक सहयोग रोक्ने निर्णयमा पुनर्विचार गर्ने आशा व्यक्त गरेका छन् । केही अमेरिकी सांसदहरूले उनको राजीनामा मागेको भए पनि उनले त्यसलाई खारेज गर्दै जीवनहरू जोगाउने काममा लागिरहने बताए ।

संगठनले महाव्याधिलाई ढाकछोप गर्न खोजेको र यसको व्यवस्थापनमा गल्तीहरू गरेको आरोप लगाउँदै अमेरिकाका राष्ट्रपति डोनल्ड ट्रम्पले संगठनलाई दिँदै आएको आर्थिक सहयोग अस्थायी रूपमा बन्द गर्ने बताएका थिए ।

गेब्रेयेसुसले संगठनमा लगानी गर्नु अमेरिकाका लागि महत्त्वपूर्ण रहेको र अरूलाई सहायता गर्ने मात्र नभई अमेरिकालाई सुरक्षित राख्न पनि लगानी आवश्यक रहेको बताए ।

जेनेभामा रहेको विश्व स्वास्थ्य संगठनको सबभन्दा ठूलो सहयोगी दाता अमेरिका नै हो । प्रत्येक वर्ष उसले लाखौं डलर सहायता उपलब्ध गराउँछ ।

वाशिङटनमा अधिकारीहरूले बुधवार बताएअनुसार, विश्व स्वास्थ्य संगठनको नयाँ फन्डिङमा रोक लगाइएको र यो ६० देखि ९० दिनसम्म लागू हुने बताए ।

अघिल्लो साता अमेरिकाको तल्लो सदन हाउस अफ रिप्रेजेन्टेटिभ्सका रिपब्लिकन सांसदहरूको एक समूहले टेड्रोसको राजीनामाको शर्तमा अमेरिकी सहायता दिइने शर्त ट्रम्पले राख्नुपर्ने सुझाव दिएका थिए ।

विश्व स्वास्थ्य संगठनको इमर्जेन्सिन प्रमुख डा माइक रायनले अमेरिकी सहायता रोकिएमा बालबालिकाको खोफ पोलियो निर्मूल प्रयास तथा जोखिममा रहेको मानिसको अत्यावश्यक स्वास्थ्य सेवा र ट्रमा व्यवस्थापनमा समस्या आउने बताएका छन् ।