दाङका दुई अस्पतालमा कोरोना विशेष सेवा

दाङमा दुईओटा अस्पतालले कोरोना विशेष अस्पतालका रुपमा सेवा सुरु गरेका छन् ।

प्रदेश नम्बर–५ सरकारले आयुर्वेद शिक्षण अस्पताल बेलझुण्डीमा सुरु गरेको कोरोना विशेष अस्पताल र राप्ती स्वास्थ्य विज्ञान प्रतिष्ठानले कोरोना संक्रमितहरुको उपचार गर्ने व्यवस्था मिलाएका हुन् ।

जिल्लाका साना–ठूला सबै अस्पतालले ‘आइसोलेसन बेड’ छुट्याएको बताएपनि कोरोना विशेष अस्पताल र राप्ती स्वास्थ्य विज्ञान प्रतिष्ठानले कोरोनाको आशंका गरिएका व्यक्तिहरुलाई भर्ना गरेर उपचार गर्ने गरेका छन् ।

राप्ती स्वास्थ्य विज्ञान प्रतिष्ठानमा अहिले सातजना आइसोलेसनमा रहेका छन् भने कोरोना विशेष अस्पतालको आइसोलेसनमा दुईजना रहेका छन् ।

स्वाब निकालेर परीक्षणका लागि काठमाडौं पठाउँदै आएको प्रतिष्ठानले प्रदेश–५ सरकारसँगको सहकार्यमा आफैं स्वाब परीक्षण गर्ने तयारी गरिरहेको छ ।